गजानन काळे अडचणीत; नवी मुंबई पोलिसांकडून सर्च आ‘परेशन सुरू

नवी मुंबई

नवी मुंबईतील मनसेचे नेते आणि शहराध्यक्ष गजानन काळे यांच्या अडचणीत आता वाढ होताना दिसत आहे. गजानन काळे यांच्या विरोधात त्यांच्या पत्नीने दाखल केलेल्या तक्रारीनंतर सोमवारी शिवसेना, राष्ट्रवादी काँग-ेसच्या महिला कार्यकर्त्यांनी आंदोलन करत तात्काळ अटकेची मागणी केली. त्यानंतर आता नवी मुंबई पोलिसांकडूनही गजानन काळे विरोधात शोधमोहिम हाती घेण्यात आली आहे त्यामुळे गजाजन काळे यांना कुठल्याही क्षणी अटक होण्याची शक्यता वर्तवण्यात येत आहे.

सोमवारी नवी मुंबईत राज्याचे गृहमंत्री दिलीप वळसे पाटील आले होते त्यावेळी त्यांना गजानन काळे प्रकरणारवर विचारले असता त्यांनी म्हटलं, या प्रकरणी पोलिसांना कारवाई करण्याचे आदेश दिले आहेत. त्यानंतर आता पोलिसांकडून सर्च आ‘परेशन सुरू करण्यात आल्याचं वृत्त मिड्डे ने दिलं आहे. त्यामुळे गजानन काळे यांच्यावर अटकेची टांगती तलवार असल्याचं दिसत आहे.

गजानन काळे यांच्या पत्नीने नेरूळ पोलीस ठाण्यात तक्रार दाखल करत म्हटलं आहे की, गजानन काळे गेल्या काही वर्षांपासून आपल्याला मारहाण करत असून जातीवाचक शिवीगाळ सुद्धा करतो. इतकेच नाही तर त्याचे बाहेरील महिलांसोबत संबंध असल्याचंही तक्रारीत म्हटलं आहे. आमचं लग्न 2008 मध्ये झालं आणि लग्नानंतर 15 दिवसांनी गजानन माझ्यासोबत किरकोळ घरगुती कारणांवरुन तसेच माझा सावळा रंग, जात यावरुन टोमणे मारत असल्याचंही तक्रारीत म्हटलं आहे.

शिवसेनेच्या नेत्या आणि विधानपरिषदेच्या उपसभापती नीलम गोर्‍हे यांनीही नवी मुंबई पोलिसांना पत्र लिहून गजानन काळेला तात्काळ अटक करण्याची मागणी केली आहे. तसेच आरोपी विरुद्ध असणारे पुरावे उपलब्ध करुन घ्यावेत आणि आरोपीला कठोर शिक्षा होईल अशा पद्धतीने चौकशी करुन लवकरात लवकर चार्जशीट न्यायालयात दाखल करावी असंही त्यांनी पत्रात म्हटलं आहे.