बजरंग पूनिया सेमीफायनलमध्ये, क्वार्टर फायनलमध्ये इराणच्या पैलवानाला दाखवलं आस्मान

नवी दिल्ली प्रतिनिधी

6 ऑगस्ट

भारताचा पैलवान बजरंग पूनियानं क्वार्टर फायनलमध्ये जबरदस्त डाव टाकत इराणच्या पैलवानाला अक्षरशा आस्मान दाखवलं. प्री क्वार्टरमध्ये अटीतटीच्या सामन्यात रोमांचक विजय मिळवल्यानंतर बजरंगनं क्वार्टर फायनलमध्ये समोरच्या पैलवानाला लोळवत सेमीफायनलमध्ये प्रवेश केला आहे. बजरंग आता पदकापासून केवळ एक पाऊल दूर आहे. बजरंग पूनियानं एकाच मूव्हमध्ये विरोधी पैलवानाला चित केलं. इराणच्या मुर्तजाला हरवून तो सेमीफायनलमध्ये पोहोचला आहे. आजच त्याचा सेमीफायनलचा मुकाबला होणार आहे. टोकियो ऑलिम्पिकच्या सुरुवातीपासून बजरंग पूनियाला पदकाचा दावेदार मानला जात आहे. बजरंग पूनियाकडे भारताला कुस्तीतलं पहिलं सुवर्णपदक जिंकण्याची संधी आहे.

बजरंगनं प्री क्वार्टर फायनलमध्ये किर्गिस्तानच्या एर्नाजर अकमातालिवेला हरवत पुढील फेरीत प्रवेश केला आहे. या प्री क्वार्टर फायनल सामन्यात विजय मिळवत बजरंग क्वार्टर फायनलमध्ये पोहोचला. किर्गिस्तानच्या एर्नाजर अकमातालिवे विरुद्धचा हा सामना फारच रोमांचक झाला. या कुस्तीत दोघांनी 3-3 अशी बरोबरी केली मात्र त्याआधी बजरंग पूनियानं दोन प्वाईंट घेतले होते. त्यामुळं त्याला विजयी घोषित करण्यात आलं.

कुस्तीपटू सीमा बिसलाचं आव्हान संपुष्टात

भारताची कुस्तीपटू सीमा बिसलाचं टोकियो ऑलिम्पिकमधील आव्हान संपुष्टात आलं आहे. प्री क्वार्टर फायनलमध्ये हरल्यानंतरही सीमा बिसला कांस्य पदकाच्या शर्यतीत होती. मात्र ज्या रेसलरनं सीमाला हरवलं होतं ती रेसलर फायनलपर्यंत पोहोचू शकली नाही. त्यामुळं सीमा बिसलाचं आव्हान देखील संपुष्टात आलं. कुस्तीत आता बजरंगकडूनच पदकाची अपेक्षा भारताला आहे.

भारतीय महिला हॉकी संघाचा बिटनकडून 4-3 असा पराभव

भारतीय महिला हॉकी संघाचा बिटनकडून 4-3 असा पराभव झाला. इतिहास रचण्यासाठी मैदानावर उतरलेल्या भारतीय महिला संघानं कांस्य पदकासाठीच्या या लढतीत शानदार कामगिरी केली मात्र एका गोलच्या फरकानं पराभवाचा सामना करावा लागला. भारतीय पुरुष हॉकी संघानं 41 वर्षांचा पदकाचा दुष्काळ संपवत कांस्य पदकावर नाव कोरल्यानंतर आज महिला संघाकडून महिला हॉकीतील पहिल्या पदकाची अपेक्षा होती. भारताच्या लेकींनी या सामन्यात यासाठी पुरेपूर प्रयत्न केले मात्र ते अपुरे पडले.