पंतप्रधान नरेंद्र मोदी यांनी आकाशवाणीवरून साधला देशांच्या नागरिकांशी मन की बात द्वारे संवाद

सेंट क्वीन केटेवान यांचे पवित्र स्मृतिचिन्ह सांभाळून ठेवल्याबद्दल पंतप्रधानांनी मानले गोव्याच्या जनतेचे आभार

नवी दिल्ली 25 JUL 2021

पंतप्रधान नरेंद्र मोदी यांनी आज देशवासीयांशी  मन की बात द्वारे संवाद साधला यावेळी त्यांनी देशवासीयांना आपल्या सर्व ऑलम्पिक खेळाडूंचा उत्साह वाढवण्यासाठी त्यांना शुभेच्छा देण्याचे तसेच व्हिक्टरी पंच अभियानात सहभागी होण्याचे आवाहन केले. यावेळी पंतप्रधानांनी 26 जुलै रोजी असणाऱ्या कारगिल विजय दिवसाचे स्मरण केले आणि त्या निमित्ताने कारगिल योद्ध्यांना वंदन केले.

 तसेच यावेळी पंतप्रधानांनी Rashtragaan.in  या संकेत स्थळावर जाऊन एकाच वेळी जास्तीत जास्त भारतीयांनी राष्ट्रगीत गाण्याच्या अभियानामध्ये सामील होण्याचे आवाहन केले. पंतप्रधान  पुढे म्हणाले की आपण जेव्हा कधी खादीचे उत्पादन खरेदी करतो त्यावेळी त्याचा लाभ आपल्या गरीब विणकर बंधू-भगिनींना होतो हे सांगून त्यांनी आपणा सर्वांना ग्रामीण भागात तयार होणाऱ्या हातमागाच्या वस्तू खरेदी करण्याची विनंती केली

मन की बात कार्यक्रमांमध्ये आपले संदेश आणि सूचना पाठवणाऱ्या सर्व तरुणांचे पंतप्रधानांनी आभार मानले आणि हे युवक मन की  बात कार्यक्रमाला दिशा देण्याचे काम करत आहेत असे पंतप्रधान पुढे म्हणाले. यावेळी देशाच्या वेगवेगळ्या भागात तरुण-तरुणी वेगवेगळ्या नवीन उपक्रमांद्वारे तसेच नवोन्मेषी कार्यक्रमांद्वारे करत असलेल्या विविध प्रयत्नांची पंतप्रधानांनी प्रशंसा केली आणि ओडिशाचे इसाक मुंडा, आंध्र प्रदेश मधील साई प्रनीथ आणि अशी इतर उदाहरणे पंतप्रधानांनी यावेळी दिली

केळीच्या फायबर पासून वस्तू तसेच केळीच्या पिठापासून इतर खाद्यपदार्थ तयार करणाऱ्या लखीमपुर-खीरी येथील उपक्रमांचे यावेळी पंतप्रधानांनी कौतुक केले.

सेंट क्वीन केटेवान यांचे पवित्र अवशेष जपून ठेवणाऱ्या गोव्याच्या जनतेचे पंतप्रधानांनी आभार मानले आणि यामुळे गोवा आणि जॉर्जिया यांच्यामधील संबंध अधिक दृढ झाले आहेत अशी माहिती पंतप्रधानांनी दिली. यावेळी समारोप करताना पंतप्रधानांनी पाणी वाचवण्याचे तसेच कोविड योग्य वर्तणूक जारी ठेवण्याचे आवाहन केले