शिवसेना नेते आनंदराव अडसुळांना हायकोर्टाचा दणका! ईडीच्या कारवाईला आव्हान देणारी याचिका फेटाळली

मुंबई,

सिटी सहकारी बँक घोटाळ्याप्रकरणी शिवसेना नेते आनंदराव अडसूळ यांना कोणताही दिलासा देण्यास नकार देत हायकोर्टानं त्यांची याचिका फेटाळून लावली आहे. तसेच याप्रकरणी त्यांना रितसर अटकपूर्व जामीनासाठी पीएमएलए कोर्टात दाद मागण्याचे निर्देश दिले आहे. ईडीनं अद्याप आपल्याला याप्रकरणी दाखल ईसीआयआरची कॉपी दिलेली नाही आणि ती देण्यास आम्ही बांधिल नाही अशी ठाम भूमिका तपास यंत्रणेच्यावतीनं एएसजी अनिल सिंह यांनी हायकोर्टात घेतली. तसेच अडसूळ हे केवळ नाटक करत असून त्यांची प्रकृती ठणठणीत असल्याचा दावा ईडीच्यावतीनं हायकोर्टात करण्यात आला.

लोकप्रतिनिधी राहिलेले अडसूळ जर तपासकामात अडथळा आणत असतील तर तपास कसा करणार? असा सवालही यावेळी एएसजी अनिल सिंह यांनी उपस्थित करत अडसुळांच्या याचिकेला जोरदरा विरोध केला. तर अडसुळांनी ईडीनं केवळ राजकीय दबावातून ही कारवाई सुरू केल्याचा आरोप केला. तसेच याप्रकरणात आपणच मूळ तक्रारदार होतो, तेव्हा आपल्यालाच आरोपी कसं बनवण्यात येईल? असा सवाल अडसुळांच्यावतीनं अ‍ॅड.अभिनव चंद्रचूड यांनी उपस्थित केला. मात्र, अशी अनेक प्रकरणी असतात ज्यात तक्रादारच पुढे आरोपी झालाय असं मत व्यक्त करत न्यायमूर्ती नितीन जमदार आणि न्यायमूर्ती सारंग कोतवाल यांनी अडसूळांना कोणताही दिलासा देण्यास नकार देत त्यांची याचिका फेटाळून लावली.

शिवसेनेचे माजी खासदार आनंदराव अडसूळ सिटी को.ऑ. बँकेचे अध्यक्ष असताना त्यांच्या कार्यकाळात बँकेत सुमारे 900 कोटी रुपयांचा गैरव्यवहार झाल्याची तक्रार आमदार रवी राणा यांनी केली होती. त्यानंतर ईडीने या प्रकरणाची चौकशी सुरू केली आहे. ईडीच्या अधिकार्?यांनी 27 सप्टेंबरला सकाळी अडसूळ यांच्या मुंबईतील राहत्या घरी आणि कार्यालयावर धाडी टाकून चौकशी सुरू करताच अडसूळ यांची तब्येत अचानक बिघडली. आणि त्यांना गोरेगावच्या लाईफलाईन केअर रूग्णालयात दाखल करण्यात आले. त्यानंतर गुरूवारी त्यांना तिथून डिस्चार्ज देत जवळच्याच एसआसव्ही रूग्णालयात हलवण्यात आलं. दरम्यान याप्रकरणीत दाखल ईसीआयआर रद्द करावा आणि अटकेपासून संरक्षण द्यावं अशी मागणी करत अडसुळांनी हायकोर्टात धाव घेतली होती.

आनंदराव अडसुळ यांच्यावतीने अ‍ॅड. अभिनव चंद्रचुड यांनी बाजू मांडताना कोर्टाला सांगितलं की, सिटी बँकेच्या 900 कोटी रूपयांच्या आर्थिक गैरव्यवहाराशी अडसूळ यांचा थेट कसलाही संबंध नाही. केवळ राजकीय प्रतिस्पर्ध्याच्याविरोधात अडसूळ यांनी जातपडताळणी प्रमाणपत्राची तक्रार केल्यानंच राजकीय सुडबुध्दीनं ही खोटी तक्रार करण्यात आली आहे. तसेच अडसुळ यांची प्रकृती वयोमानानुसार ढासळल्यानं त्यांना रूगणलयात दाखल करण्यात आले आहे. मात्र, रूग्णालबाहेर ईडीचे अधिकारी सशस्त्र पाहारा देत अडसूळ बाहेर पडायचीच वाट पाहत आहेत. त्यामुळे याच धर्तीवर त्यांना ईडीच्या कारवाईपासून तूर्तास दिलासा द्यावा अशी विनंती कोर्टाकडे केली गेली. तर ईडीच्यावतीनं अतिरिक्त सॉलिसिटर जनरल अनिल सिंग यांनी या याचिकेलाच जोरदार विरोधात केला. बँकेच्या गैरव्यवहारासंबंधी तक्रार आल्यानंतर ईडीनं आपली चौकशी सुरू केली, या चौकशीचा निवडणूक प्रकरणी अडसूळ यांनी केल्या तक्रारीशी काही संबध नाही. ईडीनं यापूर्वीही त्यांना चौकशीला हजर रहाण्याचे समन्स बजावलं होतं.