आयकर विभागाच्या छाप्यांबाबत आघाडी सरकारने खुलासा करावा भाजपा मुख्य प्रवक्ते केशव उपाध्ये यांची मागणी

मुंबई,

आयकर विभागाने महाराष्ट्रात घातलेल्या छाप्यांतून उघड झालेली माहिती अत्यंत धक्कादायक आहे. सरकारी कर्मचार्‍यांच्या बदल्या, नियुक्त्या तसेच सरकार दरबारी असलेली कामे करून घेण्यासाठी मध्यस्थांची यंत्रणा कोणत्या मार्गाने संपत्ती गोळा करते आहे , याची माहिती या छाप्यांतून उघड झाली आहे. या बाबत आघाडी सरकारने खुलासा करावा , अशी मागणी भारतीय जनता पार्टीचे मुख्य प्रवक्ते केशव उपाध्ये यांनी शुक्रवारी केली. भाजपा प्रदेश कार्यालयात झालेल्या पत्रकार परिषदेत ते बोलत होते.

श्री. उपाध्ये यांनी सांगितले की, आयकर विभागाच्या छाप्यात सरकारे जमिनीचे हस्तांतरण तसेच सरकारी मान्यता मिळवून देण्यापयर्ंतच्या कामांत मध्यस्थांची साखळी कशी गुंतलेली होती याची माहिती समोर आली आहे. सचिन वाजे या पोलीस अधिकार्‍याचे खंडणी प्रकरण उघडकीस आले त्यावेळी भाजपाने प्रत्येक खात्यात असे किती वाजे आहेत अशी विचारणा केली होती. आयकर विभागाच्या छाप्यातून उघड झालेली माहिती पाहता असे अनेक वाजे राज्य सरकारच्या यंत्रणेत कार्यरत असल्याचे दिसत आहे. 1050 कोटींच्या व्यवहारांची माहिती आयकर खात्याला आतापयर्ंत मिळाली आहे. आघाडी सरकारने या संदर्भात खुलासा करण्याची आवश्यकता आहे.

अतिवृष्टीमुळे उद्ध्वस्त झालेल्या मराठवाड्यातील शेतकर्‍यांना एका पैशाचीही मदत न करणार्‍या आघाडी सरकारने उत्तर प्रदेशातील घटनेबाबाबत महाराष्ट्र बंद ची हाक देऊन आपला ढोंगीपणा दाखवला आहे. आघाडी सरकारला शेतकर्‍यांचा खरंच कळवळा असता तर मुख्यमंत्री मुंबईबाहेर पडले असते आणि शेतकर्‍यांच्या बांधावर पोहचले असते. मात्र मुख्यमंत्री मुंबईत घरातच बसून आहेत. आघाडी सरकारचे हे मगरीचे अश्रू आहेत. गोवारी मोर्चावर व मावळ गोळीबारावेळी राज्यात राष्ट्रवादी व काँग्रेसचेच सरकार होते हे जनता व शेतकरी विसरलेली नाही , असेही श्री . उपाध्ये यांनी नमूद केले.

अंमली पदाथार्ंच्या सेवनाने उद्ध्वस्त होऊ पाहणार्‍या तरुणाईला वाचविण्यासाठी केंद्र सरकारच्या अंमली पदार्थ विरोधी पथकाने ( एनसीबी ) मुंबईत एका क्रूझ वर केलेली कारवाई योग्यच आहे. अशा कारवाईला विरोध करणार्‍यांनी तरुणाईला वाचविण्यासाठी अशा मोहिमांना तुमचा पाठिंबा आहे की नाही, याचे उत्तर द्यावे , असेही श्री. उपाध्ये म्हणाले.