महाबळेश्वरमध्ये वाघोबाचं दर्शन; आनंद महिंद्रांनी व्हिडीओ पोस्ट करताच नेटकर्‍यांनी सुधारली चूक
मुंबई,
अमुक एका व्याघ-प्रकल्पाला भेट दिली किंवा तमुक एका अभयारण्याला भेट दिली, असं सांगत असताना त्या व्यक्तीच्या अनुभवांमध्ये ’… आणि आम्हाला वाघ दिसला’ असा उल्लेख आला की ऐकणार्‍याचं कुतूहल आणि उत्सुकता त्या व्यक्तीच्या चेहर्‍यावरुनच व्यक्त होताना दिसते.
एखादा अशाच प्रसंगाचा व्हिडीओ पाहतानाही पाहणार्‍याची साधारण अशीच प्रतिक्रिया. नुकतंच महिंद्रा अँड महिंद्रा समुहाचे अध्यक्ष आनंद महिंद्रा यांनी एक व्हिडीओ शेअर केला आहे. ज्यामध्ये त्यांनी महिंद्राच्या एका कारचा उल्लेख करत हा व्याघ-दर्शनाचा व्हिडीओ अद्वितीय असल्याची प्रतिक्रिया दिली.
महिंद्रा यांनी शेअर केलेला हा व्हिडीओ पाहताना त्यावर काही माहिती दिसते. त्यानुसार हा व्हिडीओ महाबळेश्वर मार्गे जाताना लागणार्‍या पाचगणी क्षेत्रातील असल्याचं कळत आहे. वाघ दिसल्याची भीती, उत्सुकता आणि कुतूहल अशा अनेक भावना तो समोरुन पाहणार्‍या व्यक्तींच्या आवाजातून व्हिडीओ पाहताना जाणवते.
आतापर्यंत हा व्हिडिओ एक लाखांहून अधिक नेटकर्‍यांनी पाहिला असून, काही तासांतच तो प्रचंड लोकप्रिय झाला. आनंद महिंद्रा यांनी पोस्ट केलेल्या या व्हिडीओमध्ये ठिकाण महाबळेश्वर दाखवण्यात आलं आहे. पण, मुळात ते महाबळेश्वर नसल्याचं म्हणत सोशल मीडिया युजर्सनी हा व्हिडीओ मध्य प्रदेशातील पेंच अभयारण्यातील असल्याचं सांगितलं.
कोणी हा व्हिडीओ महाराष्ट्रातील ताडोबा व्याघ- प्रकल्पातील असल्याचं सांगितलं. तर कोणी हा व्हिडीओ 2 वर्षे जुना असल्याचं सांगितलं.
