परमबीर सिंग गायब? सुटीवर असलेले परमबीर सिंग गेले कुठे? चर्चांना उधाण

मुंबई,

माजी गृहमंत्री अनिल देशमुख यांच्यावर शंभर कोटींच्या वसुलीसंदर्भात आरोप लावून देशाच्या राजकारणात खळबळ उडवून देणारे मुंबईचे माजी पोलीस आयुक्त परमबीर सिंग हे सध्या मोठ्या सुटीवर गेले असून अजुनही ते कामावर हजर न झाल्याने आता वेगवेगळे तर्क लावले जात आहेत. या प्रकरणी ईडीकडून देशमुखांविरोधात फास आवळला जात असतानाच परमबीर सिंग यांची गैरहजेरी चर्चेचा विषय ठरत आहे हे येथे उल्लेखनीय.

परमबीर सिंग यांनी मार्च महिन्यात लेटर बॉम्ब टाकला होता. त्यानंतर ते गृहरक्षक दलाचे संचालक म्हणून काही दिवस कामावर हजर झाले आणि 5 मे रोजी सुटीवर गेले. तेव्हापासून ते आजपर्यंत सिंग कामावर हजर झालेले नाही. गृहविभागाकडून दोन वेळा पत्र पाठवून त्यांना विचारणा करण्यात आली. मात्र त्यांच्याकडून कोणतेही उत्तर देण्यात आलेले नाही. परमबीर सिंग यांच्याविरोधात गुन्हे दाखल झाल्यानंतर त्यांच्याशी संपर्क होत नसल्याने लूकआऊट नोटीसही जारी करण्यात आली आहे. दरम्यान, परमबीर सिंग सध्या चंदीगड येथे असल्याचे बोलले जात आहे. मात्र सूत्रांच्या माहितीनुसार त्यांच्या चंदीगडमधील घरालाही कुलूप असल्याचे समजते आहे. त्यामुळे परमबीर सिंग गेले कुठे या चर्चांना उधाण आले आहे.

परमबीर सिंग यांच्या अनिल देशमुखांवरील आरोपांसंदर्भातले प्रकरण न्यायप्रविष्ट असताना परमबीर सिंग कुठे आहेत असे विचारले असता ते चंदीगडमध्ये असल्याचे त्यांच्या वकिलांनी न्यायालयात सांगितले. दरम्यान, परमबीर सिंग हे आजारी असल्याचे सांगत त्यांच्या औषधोपचारांची कागदपत्रेही पाठविण्यात आली होती. दरम्यान, मोहर्रम आणि गणेशोत्सवाच्या पार्श्वभूमीवर होमगार्ड यांची नियुक्ती महत्वाची असते. मात्र परमबीर सिंग सुटीवर असल्याने सध्या या विभागाचा प्रभार के व्यंकटेशम यांच्यावर सोपविण्यात आलाय.

उद्योजक मुकेश अंबानींच्या घराजवळ स्कॉर्पिओत स्पोटके आढळल्याच्या प्रकरणानंतर परमबीर सिंग यांची आयुक्त पदावरून उचलबांगडी करण्यात आली होती. त्यानंतर परमबीर सिंग यांनी शंभर कोटी वसुली प्रकरणाचा ’लेटर बॉम्ब’ टाकत देशमुखांवर आरोप केले होते. या ’लेटर बाँम्ब’ने राज्याच्याच नव्हे तर देशाच्या राजकरणात मोठी खळबळ उडाली होती. यावरून विधानसभेच्या अधिवेशनात विरोधकांनी सरकारला लक्ष्य केले होते.