राष्ट्रीय बंजारा टायगर्स संघटना काँग्रेस पक्षासोबत संलग्न. (नरेंद्र मोदी व भाजपने बंजारा समाजाची फसवणूक केली!: प्रदेशाध्यक्ष मा. नानाभाऊ पटोले)

पंजा फक्त टायगर जवळच असतो आणि टायगर काँग्रेसमय झाला.

दैनिक महाराष्ट्र सारथी मुंबई प्रतिनिधी(अशोकराव चव्हाण),

दि. २९ जून २०२१
भारतीय जनता पक्षाने धनगर, मराठा समाजाची जशी फसवणूक केली तशीच फसवणूक बंजारा समाजाचीही केली आहे. २०१४ च्या निवडणुकीवेळी नरेंद्र मोदी यांनी सत्ता आल्यानंतर बंजारा समाजाला आदिवासींचे आरक्षण देतो असे लेखी आश्वासन दिले होते. पण आजपर्यंत त्यांनी तो शब्द पाळला नाही. बंजारा समाजाची फसवणूक करून समाजाच्या दैवतांचा मोदींनी घोर अपमान केला आहे,असे महाराष्ट्र प्रदेश काँग्रेस कमिटीचे अध्यक्ष नाना पटोले यांनी म्हटले आहे.

नाना पटोले यांच्या उपस्थितीत टिळक भवन येथे राष्ट्रीय बंजारा टायगर्स संघटना काँग्रेस पक्षासोबत संलग्न करण्यात आली. संघटनेचे राष्ट्रीय अध्यक्ष आत्मारामजी जाधव, राष्ट्रीय कार्याध्यक्ष मदनभाऊ जाधव,राष्ट्रीय महासचिव-वाल्मिक पवार,प्रदेश सरचिटणीस-भारत राठोड,यांच्यासह संघटनेच्या सर्व पदाधिकाऱ्यांनी काँग्रेस पक्षात प्रवेश केला. यावेळी आ. राजेश राठोड, प्रदेश उपाध्यक्ष संजय राठोड, प्रदेश प्रवक्ते अतुल लोंढे, डॉ. राजू वाघमारे, देवानंद पवार, डॉ. गजानन देसाई, रामकिशन ओझा, वाल्मीक पवार, लक्ष्मणराव भुरे,एनएसयुआयचे अमीर शेख आदी उपस्थित होते.
राष्ट्रीय बंजारा टायगर्स संघटनेच्या सर्व पदाधिका-यांचे काँग्रेस पक्षात स्वागत करून नाना पटोले म्हणाले की, स्व. वसंतराव नाईक,सुधाकरराव नाईक साहेबांचे महाराष्ट्राच्या विकासात मोलाचे योगदान राहिले आहे. त्यांनी राज्यात ऊर्जा प्रकल्पांची निर्मिती करून राज्याला प्रकाशात आणले, वसंतराव नाईक यांच्या नेतृत्वाखाली हरितक्रांती झाली. बंजारा समाजाने राज्याला दिशा दाखवून दिली. बंजारा समाज हा आत्मसन्मासाठी लढणारा, देशहितासाठी काम करणारा समाज आहे.

राष्ट्रीय बंजारा टायगर्स संघटना आज काँग्रेस पक्षासोबत संलग्न झाली,टायगरला इलाका नसतो आणि पंजा फक्त टायगरकडे असतो आणि आता टायगर (वाघ) काँग्रेसमय झाला आहे,असा मिश्किल टोला पटोले यांनी लगावला.
यावेळी बोलताना आ. राजेश राठोड व प्रदेश काँग्रेसचे उपाध्यक्ष संजय राठोड यांनी राष्ट्रीय बंजारा टायगर्सच्या सर्व पदाधिका-यांचे काँग्रेस पक्षात स्वागत केले. बंजारा टायगर काँग्रेस पक्षासोबत संलग्न झाल्यामुळे काँग्रेस पक्षाची ताकद वाढणार आहे.भाजपचा खरा चेहरा आता बंजारा समाजासमोर आला असून बंजारा समाज भाजपला थारा देणार नाही असे ते म्हणाले.
सद्याच्या परिस्थितीत फक्त काँग्रेस पक्षच बंजारा समाजाला न्याय देऊ शकतो त्यामुळे आम्ही काँग्रेस पक्षात प्रवेश केला असून यापुढे काँग्रेस विचारांवर वाटचाल करू व राज्यभरात काँग्रेस पक्षासोबत काम करुन संघटना मजबूत करू असे संघटनेचे राष्ट्रीय अध्यक्ष-मा.आत्मारामभाऊ जाधव,राष्ट्रीय कार्याध्यक्ष-मा.मदनभाऊ जाधव यांनी आपले मनोगत व्यक्त करताना सांगितले.