जेव्हा एका शाळेच्या मैदानात अचानक लँड झालं चिनूक हेलिकॉप्टर

बक्सर,

बिहारच्या बक्सर येथे भारतीय हवाई दलाच्या चिनूक हेलिकॉप्टरमध्ये तांत्रिक बिघाडामुळे आपत्कालीन लँडिंग करावे लागले. हे हेलिकॉप्टर बुधवारी सायंकाळी पाचच्या सुमारास माणिकपूर हायस्कूलच्या आवारात उतरले. यामध्ये हवाई दलाचे 20 हून अधिक अधिकारी आणि कर्मचारी उपस्थित होते. असे सांगितले जात आहे की हे हेलिकॉप्टर प्रयागराजहून पाटणामधील बिहटा हवाई दल स्टेशनकडे जात होते. हेलिकॉप्टरच्या पंख्यामध्ये तांत्रिक बिघाडामुळे आपत्कालीन लँडिंग करावे लागले.

ग-ामस्थांचे म्हणणे आहे की, त्यांनी पाहिले की अचानक हेलिकॉप्टरच्या पंखातून ठिणगी बाहेर येत आहे आणि हेलिकॉप्टर खाली येत आहे. वैमानिकाने अतिशय हुशारीने काम केले आणि हेलिकॉप्टर सुरक्षितपणे उतरवले. हवाई दलाचे सर्व अधिकारी पूर्णपणे सुरक्षित आहेत. घटनेची माहिती मिळताच राजपूर पोलीस ठाण्याचे पोलीस उपनिरीक्षक ताज मोहम्मद यांच्या नेतृत्वाखाली पोलीस पथक घटनास्थळी पोहोचले. हवाई दलाच्या सर्व अधिकार्‍यांसाठी शाळेच्या खोल्यांमध्येच राहण्याची आणि खाण्यापिण्याची व्यवस्था करण्यात आली आहे.

शाळेच्या प्रांगणात हेलिकॉप्टर उतरताना पाहण्यासाठी अचानक गावकर्‍यांची गर्दी जमली. लोक हेलिकॉप्टरसह सेल्फी घेऊ लागले. राजपूर पोलीस ठाण्याचे पोलीसही घटनास्थळी पोहोचले. एसपी नीरज कुमार सिंह म्हणाले की, तांत्रिक बिघाडामुळे हेलिकॉप्टर उतरवण्यात आले आहे. हेलिकॉप्टरमधील सर्व अधिकारी सुरक्षित आहेत. घटनास्थळी पोलीस तैनात करण्यात आले आहेत, हवाई दलाच्या अधिकार्‍यांना काही मदत हवी असल्यास ती तेथे दिली जाऊ शकते.

हवाई दलाच्या अधिकार्‍यांसह अभियांत्रिकी विभागाला चिनूक हेलिकॉप्टरच्या आपत्कालीन लँडिंगची माहिती देण्यात आली आहे. त्रुटीचे कारण शोधले जात आहे.