भारताने मालिका गमावली, इंग्लंडचा 8 गडी राखून विजय

चेम्सफोर्ड

15 जुलै

भारतीय महिला क्रिकेट संघाला इंग्लंड महिला क्रिकेट संघाविरुद्धच्या तिसर्‍या आणि अखेरच्या निर्णायक टी-20 सामन्यात दारूण पराभव पत्कारावा लागला. इंग्लंड संघाने हा सामना 8 गडी राखून जिंकत मालिका 2-1 ने खिशात घातली. भारताने प्रथम फलंदाजी करताना निर्धारित 20 षटकात 153 धावा केल्या होत्या. इंग्लंडने हे आव्हान 18.4 षटकात दोन गड्याच्या मोबदल्यात सहज पूर्ण केले. डॅनियल वॅट हिने नाबाद 89 धावांची खेळी करत भारताच्या मालिका विजयाच्या आशेवर पाणी फेरले.

चेम्सफोर्डच्या काउंटी ग-ाउंडमध्ये रंगलेल्या निर्णायक सामन्यात भारतीय संघाने नाणेफेक जिंकत प्रथम फलंदाजी करण्याचा निर्णय घेतला. तेव्हा भारताची स्फोटक सलामीवीर शफाली वर्मा शून्यावर माघारी परतली. तिला कॅथरिन ब-ंटने क्लिन बोल्ड केले. त्यानंतर हरलीन देओल (6) देखील स्वस्तात बाद झाली. तेव्हा स्मृती मंधाना आणि कर्णधार हरमनप्रीत कौर यांनी भारताचा डाव सावरला. दोघींनी तिसर्‍या गड्यासाठी अर्धशतकी भागिदारी केली.

सिवरने हरमनप्रीतला पायचित करत भारताला तिसरा धक्का दिला. हरमनप्रीतने 26 चेंडूत 5 चौकार आणि 1 षटकारांच्या मदतीने 36 धावांची खेळी केली. हरमनप्रीत बाद झाल्यानंतर अष्टपैलू स्नेह राणा अवघ्या 4 धावा करत बाद झाली. एका बाजूने गडी बाद होत असताना स्मृती मंधानाने दुसरी बाजू लावून धरली. तिच्या खेळीच्या जोरावर भारताला दीडशेचा टप्पा गाठता आला. रिचा घोषने 20 धावांचे योगदान दिले.

स्मृती मंधानाची झुंजार खेळी

शफाली वर्मा शून्यावर बाद झाल्यानंतर स्मृतीने जबाबदारीने खेळ केला. तिने एक बाजू लावून धरली. यामुळे हरमनप्रीत कौरला मुक्तपणे फटकेबाजी करता आली. स्मृतीने 51 चेंडूत 70 धावांची खेळी साकारली. यात 8 चौकार आणि 2 षटकारांचा समावेश आहे.

भारताने विजयासाठी दिलेले 154 धावांच्या आव्हानाचा पाठलाग करण्यासाठी उतरलेल्या इंग्लंडची सुरूवात खराब झाली. सलामीवीर टॅमी ब्यूमोंट वैयक्तिक 11 धावांवर बाद झाली. तिला दीप्ती शर्माने पायचित केले. यानंतर डॅनियल वॅट आणि नताली सिवर या दोघींनी दुसर्‍या गड्यासाठी शतकी भागिदारी करत भारताच्या विजयाच्या आशा संपूष्टात आणल्या. संघाची धावसंख्या 132 असताना स्नेह राणाने सिवरला बाद केले. सिवरने 36 चेंडूत 42 धावांचे योगदान दिले. तर डॅनियल वॅट आणि हीथर नाइट या जोडीने इंग्लंडच्या विजयावर शिक्कामोर्तब केले. डॅनियल वॅटने 56 चेंडूत 12 चौकार आणि 1 षटकारासह नाबाद 89 धावांची खेळी साकारली. डॅनियल वॅट सामनावीर तर नताली सिवर मालिकावीर ठरली.